ZORAM TODAY| Aizawl 18th June, 2024 (Tue):  All Mizoram Village Council Association (AMVCA) chuan vawiin khan thuchhuah siamin, June ni 10, 2024 a Southern Headquarters ZPM Lunglei chhung inkhawm a kan Health Minister thusawi, media lama kan lo hmuh danin 'VC ten Sorkar an thawhpui that duhloh vanga VC term pawh tawi a nih mai theih thu' lo lang tel ta mai khan AMVCA te min barakhaih takzet a ni, an ti.

VC te hi India ram ropui tak Democracy lungphum pawimawh tak pathum (3)- Central, State leh Local Goverment zinga pakhat, Democracy Grassroot anlo tih hial, tualchhung Sawrkar ,"The Lushai Hills District (Village Council) Act.1953" hmanga rorel tura mipui ten kum 5 atana an thlan chhuahte kan ni a. He danin thuneihna min pekte leh Central leh State Sawrkarin Programme & Policy  hrang hranga Agency atana min hmanna kawnga tha taka thawh hi kan Duty, VC atana thlan kan nih chhan a ni, AMVCA chuan an ti.

"Kan duty tihhlawhtlinna kawngah mahni hna pawh thawk hman leklo a khawtlang leh ram tana kan buai ve em em laia hetiang thu kan hre ta mai hi mak kan tiin min thawng takzet a ni. Kan Health Minister in Sawrkar thawhpui duhlo VC a tihte hi khawi VC nge ni a, eng kawngin nge anlo thawhpui duh loh tih hi min hrih turin kan ngen a. AMVCA anga lo in zilh a, tha taka Sawrkar thawhpui tura lo infuih thar leh hi kan inpeih reng a ni tih hi min lo hriat sak se kan duh hle mai", tiin an tarlang.

"Village Council term hi Panchayati Raj System Central Sawrkarin a siam zulzuiin kum 5 term tura tih a ni a. State Sawrkar hian a duh chuan a pawt tawiin a pawtsei thei ngei mai, mahse, chhan tha tak neia tih tur ni ah kan ngai. Village Council din tirh ata Covid-19  vanga thla 5 chhung MNF Ministry in a pawhsei bak kha VC term kal lai tih danglam hi Sawrkar kal tawh ten anla tih ngai loh niin kan hria. Chhan bulbal sawi tur tak hre silo a, 'VC ten min thawhpui tha duhlo', tih chhuanlam mai maia mipui ten duh taka an thlan ve tho VC te term pawh tawi sak tum niawm taka ngaihtheih thu lo lang ta hi a thalo kan ti hle," AMVCA chuan an ti a.

"Minister Lalrinpuii thusawi hi Village Council zahawmna tihbawrhbanna leh Democracy pawngsualna ah kan ngai tlat a ni. Sawrkar in min thawhpui a duh phawt chuan kan inhawng em em zawk a ni tih hi All Mizoram VC Association angin kan han puang duh a ni," an ti bawk.